Сонголт

Эд баялаг ба эрхэм хайрын сонголт хүнийг тодорхойлох мөчид

Энхрийлж өсгөсөн ээжийгээ ч түлхэх өдөр ирдэг гэж үү

Эд баялаг гэгч нь харам сэтгэлийг өрдөн

Эргэх он цагийн туршид энхрийлж хайрласан бүхнээ

Эргэлзэх зүйлгүй таягдан хаях харам шуналын сэтгэлийг өрдөнө

Андалж нөхөрлөх үедээ алдхан биесээ дэмнэн

Аяга хоолоо ч хуваалцан энгийн нөхөрлөлөөрөө бахархан

Элэг зүрхээ дэвтээж эргэн санах дурсамжтай явсан ч

Эд баялаг ихсэх үед энэ бүгд нь үнэгүй мэт болох нь

Эгэл нэгэн андаа ч хардах харын сэтгэлийг өрдөх нь

Энэ л хорвоогийн энгийн нэгэн сорио

Эд баялаг эрхэм хайрын сонголтонд онч мэргэн байх болтухай

Эмх цэгц

Эрин зуунаар алслагдсан тэртээгээс

Эрдэм мэдлэг хуримтлагдан цугларч

Цаг хугацааны шалгуурт шигшүүлж

Цаглашгүй мөнхийн тавиланд бөхлөгдөхүйд

Эцэс төгсгөлгүй мэт мөнхийн урсгал

Түүх хүүрнэнэ

Хүүрнэсэн түүх биелэлээ олж биеийг тэтгэхүйд

Эзэн заяа орон зайг дүүргэн олныг дагуулна

Дагуулсан түмэн зөвийг хайж зүтгэлийг үнэлнэ

Зүтгэлийн утсаар эмх журам тогтох ч

Зүтгэлгүй бүхний хоосон цэцэрхэлээр

Зүүж бүтээсэн бүхнийг өөрийн болгох булхайнууд

Зүүмэл хөнжилд хөлөө жийх нь гамшиг

Зөвийг тандах ухааны үзүүрээс атгасан олон

Зөв буруугийн өтгөн мананг сарниулах эмх цэгцийг хүснэ

Эмх цэгц эрхэт төрд тогтовоос

Зүтгэлгүй булхайд орогнох зай үгүй болно